ولد الغلابة يثير غضب الصعايده..وشاب صعيدي يرد علي إهانة الصعيد ويوجه رسالة للاعلام المصري

31

كتبت / مي يوسف

 

 

بالنسبه لمسلسل مايسمى “ولد الغلابه” اللي بيحكي حاجات مش كويسه عن الصعايده وبعض قري معينه بوجه رساله للاعلام الفاسد انا صعيدى وعايز اوضحلكو بعض الأمور الي متعرفوهاش عن الصعيد والصعايدة علشان للاسف كل معلوماتكم من خلال المسلسلات.
في مشهد من مسلسل ولد الغلابه بيتريقوا فيه ع الصعايدة انهم هناك ف الصعيد بيزغطوا الوزة و بيملوا القلل و بيطفوا النور الساعة ٦ !
انا عايز اقلكم علي شوية حاجات انتوا مش هتشوفوها في المسلسلات بس هي دي الحقيقة .
١- في الصعيد مفيش عشوائيات زي اللي موجودة في القاهرة كلها بيوت جميله وحوليها زرع وخضرا يعني منظر يريح العين ويهدي الاعصاب ويساعد علي الإبداع
٢- في الصعيد مفيش بلطجية ولا سرقه بالاكراه ولا اي حاجه من الجرائم الي موجوده في القاهره علشان كل الناس عارفه بعضها ولما حد بيغلط بيلقولو كبير يترد عليه ويقدر يحكمو للاسف هنا محدش ليه كبير يترد عليه
٣-في الصعيد اهالينا بتعرف تربينا صح معندناش تحرش ولا خطف ولا اي من الصفات المنيلة دي
٤- في الصعيد متلاقيش راجل عندنا بيدعم ال love wins و لا بنت single mother
٥- في الصعيد مفيش عيله مفيهاش دكتور او مهندس او ظابط او قاضي أو عضو مجلس شعب علشان هناك كل عيله حريصه ان يكون منها كوادر تفتخر بيهم وعلشان كدا بيدعمهوم علشان يطلعو حاجه تشرفهم
٦- في الصعيد معندناش زحمة ولا بلاعات ضاربة في الشوارع زي هنا
٧- في الصعيد المستوي الفكري و الاجتماعي و المادي متقارب مفيش تفاوت والطبقه الوسطه عايشه كويس مش زي هنا مطحونه
٨- في الصعيد الصغير بيحترم الكبير والكبير بيتعامل مع العيل الصغير انو راجل علشان كدا بنطلع رجاله متحمله المسئوليه من صغرها مش زي هنا يبقي هلف كبير ومستني ياخد المصروف علشان متعودش يبقي راجل
٩-فى الصعيد مش بنرمى امهاتنا فى الشارع ولا بنضربهم ولا بنوديهم دار مسنين علشان نخلص منهم
١٠-فى الصعيد مش بنتجوز ونرمى عيالنا فى الشارع
١١-فى الصعيد عندنا نخوه ومترابطين ورجاله مع بعض ونعرف الأصول وفي الفرح والحزن واقفين مع بعض
١٢-فى الصعيد بنقف مع المحتاج وبنبقى سند ف ظهر بعض
١٣-فى الصعيد لو شفنا حد كبير ف الأرض بنسنده او بنعدى بيه الشارع ما بنقولش ملناش فيه
١٤-فى الصعيد مش بنبيع عيالنا
١٥-الصعيد فى اخلاق ونخوه ورجوله

loading...
SEOClerks

اترك رد

لن يتم نشر عنوان بريدك الإلكتروني.

loading...